吹水@香港

其實呢個台都幾好睇。

之前9:30有「獅子山下」，入面有個角色叫德叔，情同講嘢都好生鬼，相信吳孟達就係受呢個角色影響。

更有趣嘅係呢套嘢真係有吳孟達（客串？），不過當年嘅吳孟達個樣其實好似黑人少年，爆炸頭黑黑實實，講嘢又斯斯文文咁。另一個間唔中都會出場嘅就係周潤發 。當年佢有少少baby fat咁，有時會扮不良少年。有時又會做好人角色，佢講對白又係好斯文。另一個幾特別嘅演員係夏雨，原來佢後生果時係好靚仔下，不過只係出過一兩次場。

呢套嘢初時係有喜劇性質嘅教育節目，會講下當年嘅社會時事同社會問題，說教味稍重但整體氣氛都係樂觀積極。後來就變成以描寫小人物嘅寫實劇，演變過程中出現好多唔同嘅拍攝手法，有奇幻，有寫實，有時空交錯，有偷拍，仿動作片等等。

不過佢有樣嘢佢由始到終都係做得好好，就係真實。實景拍攝，經常出現街景，拍樓梯打劫情節，就真係搵棟唐樓響樓梯打燈去拍，唔似得某間電視台咁成日用廠景。另外其中一隻係講盲人點樣生活，個導故意出去街上面拍，叫個演員扮盲人過馬路，有個鬼佬唔知道拍緊戲，真係走去個演員拖佢過馬路。結果個導演都決定呢一幕照出街。

（仲有滾水淥老鼠呀，殺牛呀，活埋巴西龜，依家都唔可能再拍呢類鏡頭啦。另外有集講黃色物品，就真係走去報紙檔同戲院門口拍......）

打燈手法似早期影樓人像攝影，明暗分明，同依家下下都世界光真係好唔同。